सिढी

सिढी
----

सधै उक्लने/ओर्लने -
'सिढीहरु'
राखोस कस्ले याद !
चढ्दाचढ्दै अनि
झर्दाझर्दै छुटि जाने एकेक गरी ।

हामी
'सिढी' बिर्सने
फगत यात्रुहरु न हौं ।……

साथ

साथ
-------

जेलिए भने त
आफ्नै खुट्टा पनि एकआपसमा
लडाउछन यात्रीलाई ।

छुट्टा छुट्टै
तर , 'साथसाथै' खुट्टाहरूले नै
पार गर्छन दुरीहरू……

बधशाला

बधशाला
---------

र
संसार एक 'बधशाला' हो
अनि हामी
बधशालाका 'मालिक' ।

रेटिरहेछौ -
बिभिन्न नाममा  , सम्पुर्ण - सम्पुर्णताहरू ।

र कहिले रेटिरहेछौ -
अरुका स्वतन्त्रता
बिचारहरू
र अस्थित्वहरू ।

अनि  कहिले रेटिरहेछौ -
आफ्नै सपना
स्वतन्त्रताहरू र अरू अरू हरू ।
हामी फगत 'बधशालाका मालिकहरू' ।

घमण्ड

 घमण्ड
-------

काध फेर्नुस ……
बिस्तारै फेर्नुस !

काध फेर्दै गर्दा
तपाइले थामेको संसार ढल्पलिएला
र , आकाश तल धर्ती माथी होला ।
त्यसैले
बिस्तारै फेर्नुस काध ।

तपाईले काध फेर्नु भएन भने
कस्ले थाम्ला र पृथ्वी ?

हो त्यसैले फेर्नुस काध
भ्रमहरूका !
हो !
फेरीरहनुस् काधहरू ……

भार

 भार
-----

तिखा किल्लाहरू
खपेकै छ- 'भित्तो'
थेग्ला कति नै बिचरा ?……

मार्ग

मार्ग
------


सिँढी नभै नचढिने
उकालोहरूमा
सिँढी चै बनाइदिन्छ कस्ले ?

सिँढी बनाउदा -
आफू छुटिने
र अरू चढ्ने अहम् /डरहरूका
'खुट्टा तनाइहरूमा !'

[ न चढ्नु उकालो
न बनाउनु सिँढी ] ……

हतारो

  हतारो
---------

एक्कैछिन त खेल्नु नि
बिहानका कलिला किरणहरू
बहदै गरेको नदीको पानीसङ्ग !

क्षणिक
'मनोरम स्पर्शैमै'
कत्ति हतारो 'दुबैलाइ'
बगिरहन………